每班上機前嘅航班簡報會(PreFlight Briefing)，同事都會分享一下工作嘅小貼士，過往嘅經歷又或者係對航班嘅目標同期望，仲有目的地嘅資料。
某日飛美國嘅航班，老總要求大家每人講一樣關於目的地嘅資料，大家就講到
「唔可以帶蛋奶類食品入境」
「乘客需要填海關申報表」
「唔可以帶水果入境」
都係一堆老掉牙嘅分享，大家講得出口，自然都會記得要做啦，點知一位新同事喺我地面前填機組人員申報表嘅時候嚇親大家
呀姐「呀妹你乜都申報哂就冇死架啦，特別係嗰啲放得入口嗰啲呀！」
新同事「哦，知啦」
海關申報表上面開始有野寫
「海鮮杯麵/糖/薯片/花生/蘋果/維他奶/麥精。。。」
呀姐「呀妹，你有蘋果？」
新同事「呀係啵唔拎得」
呀姐「咪住，你briefing話唔可以帶奶類，你有維他奶同麥精？」
新同事「係呀，唔得架？」
呀姐「維他奶同麥精係唔係奶？」
新同事「維他奶同麥精係奶咩？」
呢個時候成個廚房靜哂，大家對呢位同事嘅獨特見解不禁呆左😱
新同事「呀姐又係你叫我寫哂出黎，你又唔比我帶入去，咁點處理」
呀姐「你唔拎得入境架，要罰錢架，掉左佢或者飲左佢啦」
新同事「宜家飲左，過到嗰邊咪冇得飲？」
聽到呢句豆腐同呀姐對望左一下，倒抽一口涼氣，眼白反到後腦，異口同聲講左一句 「你比人捉到會充工兼罰錢，宜家飲左抵啲喎」 轉頭新同事就拎左一大盒家庭裝嘅維他奶同麥精喺道隊 🍻🍻🍻
咁究竟維他奶係咪奶？
而麥精又係唔係奶呢？
有冇人可以指導下豆腐 😉😉😉
Search